Ku antswisiwa ka mapeletelo na matwariselo ya marito man'wana eka ririmi ra Xitsonga

Loko swi ta eka ririmi ra Xitsonga ku na marito man'wana lawa ya twarisiwaka no peletiwa hi ndlela leyi ku nga riki yona. Eka tsalwa leri hi ringeta ku phathunula laha ku phathekeke hi ku lulamisa swihoxo leswi. Hi ta lulamisa swihoxo eka tinhlayo na tin'hweti ta lembe.

Tinomboro

Loko hi twarisa kumbe ku peleta tinomboro leti landzelaka(6,7 na 9) hi fanele hi tsundzuka leswaku ti hava xitwalwana kumbe mpfumawulo wa /n/.

swikombiso:

Tsevu ematshan'wini ya ntsevu( rito leri ri huma eka rito tsevula leswi vulaka ku pfuka kahari mixo swinene)

Kombo ematshan'wini ya nkombo ( rito leri ri huma eka rito komba/ kombetela hikuva nomboro leyi yi kombisiwa hi ritiho ra xikombankambani leri tirhaka ku komba)

Kaye ematshan'wini ya nkaye ( rito leri ri huma eka rito kayivela ritiho rin'we ku va hi heta xandla)

Tin'hweti ta lembe

Loko swi ta eka tin'hweti ta lembe ku na n'hweti yin'we leyi na yona yi twarisiwaka kumbe ku peletiwa hi ndlela leyi kku nga riki yona. N'hweti ya vukaye hi nawu yi fanele ku peletiwa kumbe ku twarisiwa handle ka xitwalana kumbe mpfumawulo wa /h/. Xik: Ndzati ematshan'wini ya ndzhati, hi leswi yi ndzatihataka kumbe ku hambinyisa xixikana na ximun'wana.